一如往年, 做個年結 - Settlement for 2010
1). 第一年派利是 :p 新手果然係論論盡盡, 撈亂左d 利是 =_= 派錯左, 將d大封既俾左普通朋友, 肉都赤埋, 好鬼論盡.. 哈哈哈
2). 小姨甥女 "肥婆藍" 出世啦, 佢同謝c9一樣都係農曆正月初五出世... 初時好怕佢婆婆因為咁而唔錫佢... 好彩後來都雨過天晴 :) ... "藍藍" 好得意架, 成日笑, 希望佢快高長大, 身體健康, 做個開心快樂活既人
3). 四月 "紙婚" , 一個令我期待既月份, 去旅行, 睇櫻花, 結婚紀念日...
4). 婚後同謝生既關係唔係幾好, 唔知點相處, 總係久唔久會嘈下交... 有一排, 謝c9好唔開心, 直至開始睇咦本書 : Love and Respect! 一個看似好簡單既道理, 卻被好多人忽略: WOMEN NEED LOVE, MEN NEED RESPECT. 所有先生太太們, 我誠意推介咦本書!
5). 9 月24日, 另一個好重要既日子, 因為, 咦一日我自己一個人出車, 點可以唔記錄呢! 成功 + 爽爆 + 自由自在... 不過, 都只係由寶琳揸去調景嶺... 你睇謝c9 幾易滿足同冇膽呀; 好在, 好快又再大膽d, 更上一層樓, 成功出 "城", 由寶琳行山路去觀塘, 最重要係, 冇謝生坐係隔離煩住哂... 希望好快可以夠膽"自己"揸返office
6). 可以容忍既限度已經去到極點. 我係指份工. YOU SEE ME GOOD I SEE YOU GOOD... 好多野都好難同人講, 有苦自己知, 你睇我好, 我睇你好. 工作上既壓力真係好大, 窒哂息, 好多好多野做. IPOs 一單一單叠住黎, 做到天昏地暗, 做到想死... 就連謝生同奶奶都出哂聲投訴啦! 謝生晚晚冇正常飯食,唔係外賣,就係公仔麵… 我都唔好意思... 咪以為有bouns, sorry, 公司一貫藉口, 都係話冇$賺or 要reserve, 冇bonus... 頂! 想搵過第二份? 話咁易咩, 又上左年幾, 唔到你話事, 你揀人? 人揀你咋!
7). "聽過你我太多心事, 但已經不再重要, 眼看你要做新娘, 做密友的真想撒嬌" - 認識你 (肥妙)好多年啦, 今日可以見證你出閣, 心裡面既喜悅真係 "講不出聲". 從前我倆無所不談, 嘈喧巴閉; 長大啦, 難免各有各為生活而忙碌, 又分隔千里, 可以講心事/傾近況既機會就少之有少... 不過, 好多事情都"在心中", 只要你需要我, 我一定支持你. 祝幸福.
除左阿肥之外, 今年都有好多老朋友及親戚結婚, 好似tsk阿公, 俏皮猫謝生, 小時候同我地幾姊弟妹一齊玩既yoyo, 靚表妹zoe... 再一次恭喜恭喜, 祝百年好合, 白頭偕老 :)
8). 馬尼拉事件後感: 媽, 爸, 細佬, 細妹, 雖然我地各有唔同既價值觀, 有d情況又可能身不由己, 又或者有d事做錯左, 又冇勇氣面對, 再或者有時唔知俾d乜人乜事蒙蔽左對眼, 做左d唔應該做既事, 犯左d唔應該既錯, 無論點, 我地都係一家人, 即使緣份未夠, 都希望大好好保重! 希望有機會雨過天晴, 期待有一日大家代同堂聚一聚
9). 放低工作, 聖誕旅行去 - 謝c9同謝老爺第一次聖誕去旅行, 戀戀沖繩. 冬天唔係正確去沖繩既時間, 不過換個角度睇, 咁樣會平dd. 沖繩直係好靚, 開初都冇抱咩expectation, 只係諗住搵處地方旅下行, release 一下緊張既工作壓力... 點知發現沖繩d風景真係靚到"dump"一聲, 如果夏天黎的話, 真係冇得頂! 唉, 可惜唔知點解今次要我請呢... 謝老爺係我咦個乞兒兜度拎飯食... 風吹雞蛋殼, 財散唔安樂...
10). 身體健康 - 謝老爺身體好似有d唔妥, 睇左好多次醫生, 又check 左好多次, 都未知點解... 希望佢平安無事... 我只想你身體健康, 要活到過百歲不須拐杖都可跟你相擁... 雖然有d肉麻, 但係真心話囉
十個夠喇! 十全十美 :P
總結 - 今年工作上有好多唔如意, 不時都轉牛角尖, 好唔開心... 要努力學識放低, 唔好太執著, 都係一份工啫... 希望多d時間同老公、家人、朋友相聚! 要多多警醒, 總要珍惜所有、知足常樂! 講出黎好簡單, 但要學習及實行卻要用上一輩子時間. 係順境時, 好易唔記得, 到逆境先記得又太遲...
新一年? 開開心心, 知足常樂
出年見 :)
Happy New Year!
No comments:
Post a Comment